A conselleira de Economía e Industria, María Jesús Lorenzana, reuniuse este martes 27 de maio co alcalde de Porto do Son, José Luís Oujo, co obxectivo de abordar as necesidades de solo empresarial no concello.
No encontro, Lorenzana aproveitou para trasladar ao rexedor “o compromiso da Xunta cos concellos e co tecido empresarial” e explicou “as novas figuras de creación de solo que o Goberno galego puxo en marcha este ano”. En concreto, a conselleira falou da Zona de Aceleración de Proxectos Empresariais e Solo (ZAPES), que ten a finalidade de dar axilidade e facilidade a aqueles proxectos que precisan solo de maneira urxente; e as Zonas industriais rurais (ZIR) pensadas para actividades industriais de menor envergadura localizadas en áreas rurais con necesidades de solo empresarial.
Ademais, lembrou que entre os anos 2009 e 2024, a Consellería de Economía e Industria apoiou ao concello, ás empresas e á veciñanza de Porto do Son con axudas por importe de 2,7 millóns de euros.
A conselleira lembrou que a estratexia do Executivo galego pasa por “facilitar o asentamento de novas empresas en Galicia e ampliar as que xa están instaladas”, e, tamén, “por desenvolver solo industrial nos concellos que teñen necesidade e onde as empresas están esperando para poder asentar as súas industrias”. Trátase de “ter un desenvolvemento industrial homoxéneo en toda a Comunidade”, engadiu.
