Dende a Dirección Xeral de Emerxencias e Interior da Xunta de Galicia veñen de entregar ao Concello de Boiro un kit de material para emerxencias en medio acuático. O concelleiro, Roberto Lojo, xunto co membro de protección civil, Pablo Romero, participaron no acto de recepción do material.
Indo ao kit recibido, dicir que está composto por: cadeiras anfibias, unha táboa e un tubo de rescate, unha caixa e unha faldriqueira (riñonera) de primeiros socorros, sendo todo este material empregado por parte do persoal da Agrupación de Voluntarios de Protección Civil de Boiro en atención ás emerxencias en praias durante a época estival.
Coa achega deste material vanse facilitar as tarefas que desenvolve o servizo municipal na atención ás emerxencias, especialmente aquelas xurdidas nos areais.
O Servizo de Protección Civil e Emerxencias do Concello de Boiro conta na actualidade cunha vintena de voluntarios que atenden todo tipo de emerxencias acontecidas no termo municipal, así como a colaboración en dispositivos de outros concellos para eventos e actividades deportivas ou culturais; incidencias solicitadas polo CIAE 112 ou as forzas e corpos de seguridade tales como incendios, accidentes de tráfico ou busca de persoas desaparecidas.
