Santiago de Compostela acolleu unha edición da Xornada Turismo en Galicia, un encontro impulsado pola Asociación da Prensa de Galicia (APG) coa colaboración da Axencia Turismo de Galicia, que reuniu a representantes de todos os sectores implicados na cadea turística —incluído o xornalístico— para reflexionar sobre os retos e oportunidades dun sector clave na economía e identidade galega.
A presidenta da APG subliñou a relevancia do evento, destacando a “presencia de representantes de tódolos sectores implicados, tamén o xornalístico, nun programa ambicioso nos seus obxectivos e que axuda a poñer en valor o que o turismo representa nas nosas vidas”. Tamén agradeceu “á Axencia Turismo de Galicia do Goberno galego pola súa colaboración para o desenvolvemento da xornada” e mostrou o seu recoñecemento a todos os participantes.
O encontro arrincou cun coloquio-entrevista sobre o turismo como oportunidade e a xestión do éxito turístico, coa participación de Juan Molas Marcellés, presidente da Mesa del Turismo de España, e Enrique Martínez Marín, presidente de SEGITTUR, moderado polo xornalista Alberto Barciela Castro.
Molas destacou o peso do turismo na economía española, lembrando que representa un 21% do PIB (13,4% directo e 8% indirecto), con máis de tres millóns de empregos e un saldo positivo de 64.600 millóns de euros na balanza de pagos. Criticou as visións negativas sobre o sector, atribuíndoas á “politización” e á falta de comprensión do seu impacto real na sanidade, educación e benestar social. Tamén sinalou carencias en Galicia, como a escaseza de conexións internacionais e o alto número de vivendas turísticas ilegais.
Pola súa banda, Enrique Martínez instou a reformular o debate turístico, centrando a atención nas persoas e empresas que sosteñen o sector, nas métricas de sostibilidade e na planificación de destinos intelixentes, modelo que España está exportando internacionalmente.
Nun segundo panel, representantes do sector galego debatiron sobre o éxito turístico da comunidade e as controvertidas taxas turísticas. José Francisco Real (Confederación Galega de Empresarios de Hostalería e Turismo) mostrouse contrario a estas taxas, a pesar de recoñecer que poderían ser unha fonte de ingresos para algúns concellos. Cesáreo González (Clúster de Turismo de Galicia) cualificounas de “imposto revolucionario” e advertiu sobre a desvantaxe competitiva de Galicia pola falta de conexións. José Antonio Liñares (Compostela Boutique Hotels) pediu que o sector participe na definición destas taxas, e Dulcinea Aguín (AVITURGA) cuestionou os datos do Ministerio sobre vivendas ilegais, denunciando restricións que, segundo ela, favorecen a entrada de capital estranxeiro.
A continuación, Luis Fernández Guitián, alcalde de Sober, puxo en valor a evolución sostible da Ribeira Sacra e os logros en calidade e sostibilidade, mentres que Juan Deza, concelleiro de Turismo de Sanxenxo, destacou o peso do turismo no municipio (80% da actividade empresarial) e as iniciativas para mellorar infraestruturas e promover un modelo urbano sostible.
O peche da xornada correu a cargo de profesionais do xornalismo especializados en turismo, nun debate sobre a turismofobia e a súa amplificación mediática. Josep María Palau (revista Viajar) alertou do papel ambiguo dos influencers, Tamara Montero (La Voz de Galicia) reclamou máis reflexión e menos polarización no debate sobre as políticas turísticas, e Carlos Cuesta (FEPET) pediu “desterrar a palabra turismofobia” e apostar por solucións equilibradas.
A Xornada Turismo en Galicia serviu como espazo de reflexión compartida entre administracións, empresas, xornalistas e cidadanía, nun momento clave para redefinir o modelo turístico galego cara á calidade, sostibilidade e cohesión social.
