O día 18 de maio celebrarase o Día Internacional da Muller no sector marítimo e Ribeira quere festexalo rendendo homenaxe ás mulleres que fixeron posíbel, co seu imprescindíbel traballo técnico dende terra (principalmente), o desenvolvemento pesqueiro e económico de toda a comarca: as redeiras.
O rexedor ribeirán, Luís Pérez xunto co concelleiro de Mar, Fernando Abraldes trasladáronse este venres 9 de maio a Aguiño, á nave das redeiras, para presentar os detalles do acto solemne de homenaxe previsto para o vindeiro 16 de maio, venres, na Sala Museo Municipal de Ribeira.
O concelleiro de Mar salientou que “no ano anterior se homenaxearon ás mariscadoras das tres confrarías e neste ano tócalles ás redeiras do concello que son nove e traballan nesta nave na que nos atopamos”. O concelleiro engadiu que as nove redeiras traballan “para sete cerqueiros que se atopan agora mesmo na campaña do bocarte no Cantábrico, agora están a centrarse no aparello da sardiña e do xurelo para cando os mariñeiros veñan da campaña do bocarte”.
Pérez Barral sinalou que “dende o Concello queremos promover esta homenaxe ás mulleres do mar porque elas teñen que ter un papel visíbel neste sector que é fundamental para a economía de Ribeira”. O rexedor falou de “reivindicar un sector feminizado que é do máis invisíbel da cadea mar-industria”. Barral, para finalizar, tendeu a man á consellería do Mar, “para que poidan ter unha condicións dignas de traballo, unhas instalacións optimizadas…, e tamén a Portos de Galicia para que os redeiros de Ribeira teñan a opción de trasladarse á antiga lonxa de Ribeira”.
