Nestes días de restricións de actividades presenciais e sociais, o tempo de lecer alóngase e o que pode ser unha condena, o exceso de tempo libre, pode ser tamén unha certa oportunidade para incrementar o noso coñecemento acerca das cousas da nosa contorna. O Concello da Pobra está a empregar os seus espazos online para mellorar as nosas opcións de lecer e aprendizaxe. Hoxe lémbranos a dispoñibilidade da Guía da natureza da Pobra do Caramiñal, unha oportunidade inmellorábel, a falta das experiencias in situ, para coñecer o rico patrimonio ambiental do municipio.
“Trátase dunha ferramenta para valorar os elementos da riqueza natural da Pobra”, explican dende o Concello, lembrando que foi redactada polo biólogo pobrense Miguel A. Conde Teira, e que mostra lugares que para “moita da nosa veciñanza serán coñecidos de sobra, mais non por iso perden importancia”.
O Concello tamén recorda que a distribución da guía ficou por desgraza interrompida pola chegada do estado de alarma, polo que houbo algúns fogares que non puideron desfrutar dela. Mentres tanto, e até que a situación se normalice (intre no que cal a veciñanza poderá facerse coa guía na Área do Medio Ambiente do Concello e levar de balde un exemplar), o Goberno local puxo á súa disposición a versión online da publicación, en formato PDF, “co fin de axudar a pasar as horas de confinamento das nosas familias”.
