A mellora da calidade ambiental do medio urbano no que se refire á contaminación acústica e atmosférica, ao sacar os vehículos privados dos centros urbanos; aumentar a seguridade por dotar de vida a rúas e prazas así como potenciar o desenvolvemento económico ao reconverter unhas zonas en decadencia nun gran centro comercial aberto son, sen dúbida, algunhas cuestións que moveron, a moitas grandes cidades levar adiante grandes proxectos de peonalización dos seus centros urbanos ou centros históricos.
Nas medianas ou grandes cidades xa ninguén discute da importancia de proceder á humanización dos seus centros urbanos. Nos EE.UU, a principios do século XIX, xa comezaba a ser algo habitual e a mediados do século XX xa era común a moitos países europeos.
Nas pequenas poboacións é importante e necesario o acordar cos afectados, antes da toma de decisións, xa que para revitalizar o centro das mesmas, primeiro habería que proceder a un cambio de hábitos por parte dos veciños e visitantes; o dispoñer dun transporte público accesible e eficiente; desenvolver campañas de publicidade e fomento das compras locais, así como a creación de zonas azuis, de aparcamento aberto, no perímetro das zonas peonís, entre outras cuestións fundamentais. Hai que ter moito coidado con facer as cousas a treo porque poderiamos dar a puntilla definida ao comercio tradicional fronte aos supermercados, grandes superficies e hipermercados.
