Este sábado 12 de abril a praia de Somorto en Esteiro (Muros) acolleu o I Taller de Iniciación á Pesca Submarina, impartido por Soraya Hermida e Belén Díaz. A experiencia formativa “contou cunha gran acollida, esgotando todas as prazas disponíbeis, e a xente marchou encantada e con ganas de repetir”, asegura o concelleiro de Deportes, Damián Torea, quen agradeceu o labor desenvolvido “por Soraya e Belén”. O concelleiro fixo saber que en datas vindeiras “anunciaremos as novas edicións de máis talleres no noso concello”.
A sesión levada a cabo en Somorto arrincou ás 10:00 horas e foi impartida por Soraya Hermida, actual campioa Galega e de España da modalidade, e Belén Díaz. O obradoiro, destinado a persoas maiores de 16 anos, incluíu sesións de teoría e de práctica. Lembrar que na I Gala do Deporte do Concello de Muros, Soraya Hermida foi a gañadora na categoría de mellor deportista feminina do ano 2024.
Dende a Concellería de Muros informaron tamén que esta pasada fin de semana Eva Formoso e Jesús García participaron no campionato de España de Trail en Ibiza. Os dous fixeron un balance positivo e Eva quedou terceira de España por equipos coa selección galega. O equipo de Goberno de Muros na súa totalidade envioulles os seus parabéns aos deportistas locais.
