O persoal do Hospital do Barbanza concentrouse este venres 11 de abril na entrada do complexo hospitalario emprazado en Ribeira en sinal de dó polo falecemento dun traballador este xoves 10 de abril no Hospital, que recibiu unha forte descarga eléctrica mentres arranxaba un sistema de climatización destinado para os quirófanos.
Tratábase dun home veciño de Oza-Cesuras de 52 anos. Ao parecer o tráxico suceso ocorreu no andar no que se atopa o servizo de Urxencias, pero malia a rapidez co que se interveu para reanimar ao traballador, nada puido facerse. O servizo de prevención de riscos laborais do Hospital do Barbanza informou que xa se abriron as pescudas para aclarar todos os detalles do accidente.
