Esta semana deixounos un heroe de catro patas: o can Elton, que, como lembraremos, foi o responsábel de que se atopase o sitio exacto onde se achaba o corpo de Diana Quer logo dos meses transcorridos dende o seu asasinato. Así o comunicou a Garda Civil a través da canle Perrosde Busqueda, que salientou na nota necrolóxica “o grandísimo labor policial despregado por Elton ao longo da súa andaina coa Garda Civil”.
A súa profesionalidade motivou que en 2016 fose galardoado como can do ano en España, amais de vir acompañada de grandes contribucións á historia do corpo, como por exemplo a localización do neno Gabriel Cruz ou da devandita Diana Quer. Elton faleceu este domingo por causas naturais á lonxeva idade de 16 anos, segundo confirmou o instituto armado, que conta con máis de medio milleiro de rastrexadores caninos entre as súas fileiras (a través do Servizo Cinolóxico), especializado en localizar drogas, explosivos ou persoas. Elton, da raza pastor belga, foi xubilado con honras en febreiro de 2019 tras ter traballado en máis de cincocentos casos.
