Ula Libraría Social, emprazada no 11 da rúa Capela da Serra de Outes, vai acoller este sábado 12 de abril, da man da banda de rock Zënzar, o libro A culpa foi de Zënzar: 35 anos de rock en galego onde os integrantes do grupo falan de todo o seu percorrido pola escena de rock galega ao longo de máis de tres décadas. Será o sábado 12, ás 12:30.
O libro, escrito por Laura Romero, é un proxecto autoeditado de 346 páxinas onde poderemos achegarnos á historia da banda desde o seu xerme máis primario (a banda Átomo a finais dos 70) ata a actualidade. Cun estilo persoal, case fanzineiro, nas páxinas desta publicación conviven texto, ilustración, fotografía e arquivo de todo tipo.
Zënzar, para quen non o saiba, é unha banda de punk rock galega procedente de Meirama (Cerceda), e formada durante o outono do ano 1987.
Son a banda con máis anos de actividade en Galiza facendo rock en galego, polo que son alcumados a miúdo como “os padriños do rock galego”. O vocalista do grupo é o polifacético Xosé Bocixa.
