Este venres 4 de abril o Concello de Ribeira e Callejeros Barbanza, a través da concelleira Antía Alberte (Benestar Animal) e Rosa Gómez (Callejeros Barbanza), presentaron os detalles da campaña de control da poboación das colonias felinas.
A campaña de castración, sinalaron, ponse en marcha para controlar a presenza de animais nas colonias, responsabilidade que recae na Administración local segundo a nova Lei de Benestar Animal, pero que tanto no caso de Ribeira como no doutros moitos concellos, tamén é asumida por entidades supramunicipais ante a imposibilidade de asumir dende os consistorios a totalidade da tarefa. A concelleira informou que os gatos das colonias se ben melloraron en calidade de vida, en boa medida grazas á xente concienciada que desexa que os animais estean nas mellores condicións e que vela por eles e dálles de comer, tamén é certo que “se non se castran ao final o que temos son colonias descontroladas”.
O que se quere fomentar dende a Concellería é a necesidade de concienciar e que a alimentación dos gatos sexa levada a cabo só por persoas acreditadas: “Dende o Concello xa levamos dúas formacións centradas neste ámbito e no futuro anunciaranse máis”. A concelleira significou que dende o Consistorio non se está a sancionar “porque pensamos que o ideal é fomentar que as persoas que teñan esa compaixón cos animais teñan a formación e a acreditación precisa para facelo, para así tamén favorecer o contacto directo co Concello e as protectoras e garantir, tamén, unha colaboración entre todas e todos que aporte datos para deseñar futuras accións e protocolos a seguir”.
Engadiu que “é importante saber a alta taxa de reprodución que teñen os felinos, unha gata pode ter até tres camadas ao ano, por iso é tan importante a castración xunto coa concienciación para controlar esas colonias felinas”.
Alberte anunciou que se priorizará a castración de colonias onde os veciños e veciñas estean dispostas a facer unha achega económica, “porque hai moita demanda e poucos medios, temos que establecer un criterio de prioridades onde non se busque un culpábel e entre todos e todas arranxar o problema das colonias”. Rematou a súa intervención aludindo a “que é unha carreira de fondo e que este ano hai novamente unha partida da Concellería para a devandita castración pero que é vital a colaboración veciñal”.
A entidade que colaborará co Concello para o proceso de castración será Callejeros Barbanza á que a concelleira agradeceu o seu traballo e á súa presidenta Rosa por acudir á presentación.
Rosa Gómez corroborou as palabras da concelleira, afirmando que si que hai un gran problema coas colonias, “saímos ano tras ano castrando gatos, o Concello pon moito da súa parte e tamén a nosa protectora con fondos propios, coa axuda de tódolos voluntarios/as, da xente e tamén de subvencións”. Rosa lembrou que cada ano as colonias necesitan actuacións novas, “este ano esperamos ou temos o obxectivo de actuar en colonias novas, tamén é fundamental o tema da desparasitación”, para rematar Rosa agradeceu “ao Concello que conte con nós, somos os que de verdade coñecemos a situación e valoramos a achega económica para tratar as colonias”.
