A Deputación da Coruña confirmou que vai atender a petición dos socialistas de Lousame de levar a cabo obras de ampliación e mellora da seguridade viaria na estrada provincial DP 4201.
As obras, segundo explicaron os socialistas do concello, permitirán incrementar o ancho da estrada, renovar o firme deteriorado e construír varios treitos de sendas para garantir a seguridade dos peóns nunha vía que conecta Boca do Souto, A Chave e Aldea Grande, tres núcleos rurais do municipio, que actualmente carecen de beiravías peonís.
Así o confirmou o portavoz do Grupo Socialista na Deputación da Coruña, Bernardo Fernández Piñeiro, que este 3 de abril visitou a zona acompañado do portavoz do PSOE de Lousame, Juan José Pego Ces, onde comprobou in situ a necesidade desta actuación.
“Trátase dunha obra que vai supor un investimento importante, polo que teremos que acometela por fases, pero o noso compromiso é levala a cabo, tal e como nos demanda o PSOE de Lousame e a veciñanza, porque se trata dunha actuación fundamental para garantir a seguridade viaria e dos veciños que circulan a pé nas marxes desta estrada, que conecta tres importantes núcleos do municipio”, afirmou Bernardo Fernández.
O portavoz provincial dos socialistas explicou que “parece ser que o Concello de Lousame xa ten un proxecto redactado, pero que aínda non foi presentado na Deputación, polo que imos pedir que este proxecto sexa actualizado e redefinido, tanto en prezo como a nivel técnico, porque entendemos que dado o ancho da vía nalgúns puntos non serían necesarias expropiacións”, apuntou.
