Finalmente e como resposta á escaseza de polbo en augas interiores e exteriores de Galicia -o que reduciu de xeito alarmante as capturas deste cefalópodo- a Consellería do Mar e o sector acordaron establecer unha parada biolóxica no mes de abril, seguida dunha veda nos meses de maio e xuño dos anos 2025-2026.
O acordo contempla o respecto das normas vixentes -peso de cada peza, capturas máximas por tripulantes e embarcación e especies asociadas e horarios de pesca- de campañas anteriores.
A paralización da actividade estractiva do polbo en abril conta co apoio económico para o sector do Fondo Europeo Marítimo, de Pesca e Acuicultura (Fempa) da UE, que contempla este tipo de axudas á paralización temporal e habilita as mesmas para a conservación e mellora das condicións de vida e traballo das persoas adicadas a esta actividade e de fomento do desenvolvemento sustentable do sector.
As nasas do polbo deben ser recollidas dos caladoiros e trasladadas a porto antes de que, en abril, comece a parada biolóxica subvencionada.
Para que o acordo acadado este luns sexa efectivo, o mesmo debe ser publicado no Diario Oficial de Galicia (DOG). Por este acordo, durante os meses de abril, maio e xuño
queda absolutamente prohibida a captura do cefalópodo citado para calquera arte de lesca en augas de competencia da comunidade autónoma galega en materia de marisqueo. A prohibición afecta tamén á pesca marítima recreativa e a captura de polbo con calquera outra arte distinta á nasa.
O acordo entre a Consellería e o sector polbeiro é reclamado por este dende vai varios anos (cando aínda era conselleira Rosa Quintana) sabedores de que a veda do polbo non estaba a ser aplicada axeitadamente, permitindo a captura do cefalópodo cando este estaba en plena época de reprodución. Foron numerosas as queixas neste senso emitidas e a piques estiveron ambas as partes en lle dar unha solución ao problema durante o pasado ano 2024. Cómpre agardar de que o decidido este luns sirva oarfa recuperar a especie, as economías dos polbeiros e reactivar a actividade da lonxa de Ribeira, a máis importante de Europa nas transacións do polbo.
