Que Ana Peleteiro é unha atleta galega de Ribeira é algo, coido eu, que non descoñece ningunha das persoas interesadas no atletismo e, nomeadamente, na especialidade do triplo salto e na que Peleteiro ven de repetir título. Pero, no meu criterio -que pode ser errado- hai medios de comunicación que semellan estar máis interesados na vertente “rosa” da atleta que na súa faceta de triplista cando, coma é o caso do xornal 20minutos, o seu é a información xeral.
Este luns, o devandito diario de tjraxe nacional ocupábase de Ana Peleteiro para salientar, sobre todo, o feito de que esta constrúe en Ribeira unha casa “sobre un perímetro de 2.000 metros cadrados e cun salón comedor e cociña con dobre altura e unha superficie aproximada de 130 metros cadrados”. Obviamente, é “un novo fogar no que vivir coa súa filla Lúa” e a súa parella e adestrador Benjamín Compaoré.
Pormenoriza a reportaxe detalles “significativos” de Ribeira, “un dos portos pesqueiros máis importantes do país”. E engade que “amais, os seus 27.111 habitantes fan del un dos máis poboados desta provincia galega”, salientando, asimesmo, que Ribeira “conta cun grande patrimonio cultural e etnográfico” o que pode verse mos cruceiros “da capeliña de Deán e O Castelo, o cruceiro da praza de Teruel e o do Pombal” e que, amais poden atoparse neste municipio “outros monumentos emblemáticos e puntos de interese coma a igrexa de Sata Uxía de Ribera”.
No titular da información: “O pobo de Galicia onde Ana Peleteiro ten a súa nova casa: famoso polo seu importante porto pesqueiro”.
J.R.M. asina esta información de “20minutos” que calquera pode extraer da Wikipedia onde, por certo, ao facer referencia á importancia do porto pesqueiro ribeirense, a Wikipedia sjnala que o de Ribeira é un “dos portos pesqueiros de baixura máis relevantes da provincia e mesmo de Europa” e que ten o título de cidade, concedido en 1906 polo rei Alfonso XII, cuestión que obvia o/a asinante do traballo xornalístico citado, máis interesado/a na nova casa da atleta ribeirense que nas marcas e medallas por esta acadadas.
E no que atinxe ao “patrimonio cultural e etnográfico” de Ribeira, este é “algo máis” que os catro cruceiros que cita. Non sería malo que se dera unha volta pola cidade e outra polo resto do municipio opara escribir sobre o “pobo” de Ribeira.
