Este sábado 8 de marzo o Laboratorio Ecosocial do Barbanza organizou un obradoiro de prospectiva comunitaria para axudar á Comunidade de Montes de Baroña (Porto do Son) a visualizar colectivamente o futuro dos nosos montes e transformar esa visión en accións concretas no presente para conseguilo. Durante a xornada, as persoas participantes tiveron a oportunidade de colaborar na creación do Plan de Acción Comunitaria de Baroña, un documento estratéxico que marcará os pasos necesarios para, en palabras da Comunidade, “facer realidade o monte que soñamos para 2055”. A cita, celebrada con formato aberto e participativo na Casa Forestal de Baroña, contou coa presenza de veciñas e veciños da contorna, compartindo cadansúa visión particular sobre o futuro do monte: o futuro desexábel.
A metodoloxía de traballo, implementada polos membros da fundación Montescola, axudará ao colectivo a identificar retos e oportunidades ambientais “cunha visión a futuro”.
Foi, en palabras dos organizadores, “unha actividade amena na que os asistentes analizaron tanto o monte como a parroquia, chegando a coincidir en moitas cousas aínda sendo persoas moi diferentes e con pensamentos diversos”.
A xornada rematou cun Plan de Acción conxunto “cunha cronoloxía clara e unhas metas ben definidas”.
As e os responsábeis da Comunidade agradeceron a asistencia das persoas participantes na xornada, e tamén do Laboratorio Ecosocial do Barbanza e da Fundación Montescola.
