O Concello de Muros pon en marcha o programa Activa a Túa Mente, que inclúe obradoiros de memoria que se desenvolverán do 10 de marzo ao 30 de maio. A actividade está dirixida ás persoas adultas interesadas na prevención do deterioro cognitivo e o coñecemento do envellecemento activo.
“O obxectivo é o fomento de hábitos saudables dende un enfoque activo e positivo en áreas cognitivas, emocionais, funcionais e sociais, como precursor dun axeitado mantemento de vida independente nas persoas adultas maiores participantes”, explicou Mario Martínez, concelleiro de Servizos Sociais de Muros.
“Para dar resposta ás demandas da veciñanza, este ano engadimos as sesións en Torea e mantemos as de Muros e Esteiro”, engade Martínez.
A metodoloxía dos obradoiros é activa e dinámica, sempre cunha explicación e capacitación da funcionalidade e o obxectivo de cada serie de exercicios e propostas.
As sesións, coa colaboración de Afafes, realizaranse dúas veces por semana e teñen unha duración dunha hora e media.
As prazas son limitadas. Inscricións en Servizos Sociais do Concello de Muros: 981 762 465.
