Este mércores 19 de febreiro celebrouse en Ribeira unha das iniciativas máis destacadas da axenda do Concello destinada a conmemorar o Día de Rosalía de Castro, este domingo 23-F. O acto institucional consistiu na plantación dunha filla da figueira de Rosalía de Castro que a propia Fundación lle doou ao Concello de Ribeira por mediación de Anxo Angueira, presidente da Fundación e tamén membro da RAG. No acto estiveron presentes varios membros do Goberno local ademais do alcalde, Luís Pérez Rabal, rapazada de primaria de diferentes colexios e o gaiteiro de Ribeira, Alberto Millán que comezou o acto tocando a Alborada de Rosalía.
A continuación o académico mostrou o seu agradecemento por estar en Ribeira: “Veño dende Padrón e veño encantado e feliz de participar neste acto cheo de alegría, para min é unha honra ter parte activa neste acto plantando unha figueira que chegou dende Padrón a Ribeira da horta de Rosalía a este xardín de Ribeira que é un símbolo da irmandade entre a Casa de Rosalía e o pobo de Ribeira”. Angueira puxo en valor a colaboración que está tendo o Concello coa Casa de Rosalía xa que anteriormente a Administración local apadriñou a última edición da revista de estudos rosalianos, Follas Novas, e neste ano “tedes un conxunto de actividades extraordinarias, un exemplo para o resto de Galicia o que se está facendo en Ribeira con estas accións”. Rematou co desexo de “que esta figueira prenda en Ribeira como prende nos vosos corazóns de miniños e meniñas o amor á nosa lingua, o amor á nosa cultura, o amor a nosa terra”.
Por outra banda o rexedor sinalou ”esta árbore que arraigará nesta terra simboliza a memoria viva de Rosalía de Castro, unha das voces mais salientábeis do pobo galego”.
Pola súa banda, Pérez Barral falou dunha Rosalía pioneira e valente “porque nun tempo no que o galego estaba silenciado, decidiu escribir na nosa lingua, a lingua dos nosos avós e avoas, a lingua que hoxe falamos con orgullo. Rosalía ergueu a súa voz en galego cando outros calaban, e grazas a ela, hoxe temos unha herdanza cultural que nos identifica”. Tamén puxo en contexto a quebra na transmisión interxeracional: “Cómpre aplicar políticas e medidas que permitan promover o uso da lingua galega en todos os ámbitos, especialmente no educativo”.
Barral non esqueceu o compromiso e traballo cos máis humildes, tamén como persoa adiantada ao seu tempo na defensa dos dereitos das mulleres, “por iso, esta figueira é tamén un símbolo de resistencia, de dignidade e de esperanza. Que as súas raíces afonden no noso chan como as palabras de Rosalía afondaron no noso corazón. Que as súas pólas se estendan cara o ceo, como o exemplo de Rosalía segue a guiarnos cara un futuro de xustiza, igualdade e orgullo polo noso” e rematou: “Dende hoxe, Ribeira tamén é un concello que visibiliza o seu compromiso rosaliano e para lembrar a súa voz inmortal”.
O acto inaugural rematou co descubrimento dunha placa honorífica na compañía do himno galego.
