ULA Libraría Social (no 11 da rúa Capela de Outes) acolle este venres 21 de febreiro a presentación do libro Lúa e o paxaro (Toxosoutos), de Mª Carmen Rey Núñez. O acto literario dará comezo ás 19.00 horas.
Sinopse
Lúa é unha nena despistada e bulebule que vive cos seus pais nunha aldea do Barbanza e, segundo coidan na súa familia, desobediente. Raro é o día que non a castigan no cole. A hiperactividade que padece e ninguén lla detecta, impide que o seu maxín se centre nos estudos ou en cousas do cotián.
Porén, grazas á axuda dun paxaro que acaba de aterrar cabo dela e asegura chamarse don Tomás, a realidade, de aquí en diante, promete ser ben distinta. Vexamos, pois, como se desenvolve a historia da Lúa e o paxaro.
María del Carmen Rey Núñez (Mazaricos 1964) é unha gandeira e escritora galega que ten publicado libros tan destacados como Escapados (2017), ambientado na Guerra Civil, ou Mulleres (2018), onde conta as vidas de varias mulleres que loitan e que se opoñen ao que o destino lles quere deparar. Tamén é autora de Esconxuros para un rei, onde nos conta a historia de Zeltia, posuidora de capacidades precognitivas especiais, que é vendida polo seu pai e mais pola súa nai Xacinta (que por mor de ter o pelo roxo e pencas foxe da inquisición de Castela) a unha meiga da montaña de Lugo.
