O Concello de Boiro fixo balance da actividade en 2024 da súa Oficina de Información ao Consumidor, que se consolidou como un servizo imprescindíbel para a cidadanía e para resolver dúbidas, tramitar reclamacións ou presentar información ás persoas usuarias e consumidoras. A través del, foron atendidas no ano 2024 un total de 2.276 persoas. O Concello lembrou que se ben o ámbito de actuación da Oficina é Boiro e a comarca do Barbanza, tamén cubre as contornas de todos os concellos limítrofes e tamén da zona de Padrón, Dodro, Rois e ata Santiago.
Os obxectivos da Oficina de Consumo son informar, axudar e orientar a consumidores e usuarios para o adecuado exercicio dos seus dereitos; así como recoller e rexistrar queixas e reclamacións e remitilas aos organismos competentes; realizar actos de mediación entre persoas consumidoras e empresas; e elaborar escritos xudiciais e extraxudiciais.
As solicitudes atendidas no ano 2024 supuxeron a tramitación de 549 expedientes novos. As principais áreas nas que se realizan consultas na OMIC son por electricidade, telefonía fixa, banca e servizos financeiros, seguros e transporte aéreo; así como en compras de produtos, fundamentalmente automóbiles e electrodomésticos.
A Oficina de Consumo do Concello de Boiro está situada na Casa Consistorial e presta servizo de luns a venres en horario de 9.00 a 13.30 horas con cita previa. Máis información no enderezo electrónico consumo@boiro.org ou na web municipal.
