Por tomar unhas copas nun “after” con máis clientes dos autorizados, cinco dos ocupantes deste local situado nun dos barrios máis novos da cidade da Coruña -Mato Grande- deben pasar polas instancias xudiciais e catro policías locais que participaron no desaloxo, polas dependencias médicas. Os primeiros (entre eles un home e dous fillos seus, e unha parella) por resistencia á autoridade, e os policías como consecuencia da agresión da que foron vítimas cando desaloxaban por orde policial o devandito local de copas. Segundo a veciñanza, unha proba da degradación que padece dende vai algún tempo este barrio que conta cunha poboación maioritariamente xove.
Esta situación non é nova na cidade coruñesa, xa que logo viña producíndose con relativa frecuencia na praza de Vigo (onde xa non se repite) e na zona do Orzàn, onde ruídos, pelexas e incumprimentos de horarios estaban á orde do día.
Noutras cidades máis pequenas reprodúcense os feitos, como moi ben se pode comprobar, sen ir máis lonxe, na comarca do Barbanza. E todo co alcol coprotagonizando os eventos xusto cando se fala de que descende notablemente o consumo de bebidas, nomeadamente entre os xoves. U-lo?.
E algo de certo debe haber, posiblemente por mor da desaparición dos tan concorridos “botellóns” de masiva participación xuvenil e rapaces de entre 12 e 14 anos, algúns deles ingresados en centros hospitalarios con síntomas evidentes de ter superadas as “marcas” estipuladas como admisibles no consumo etílico.
Que fai que a mocidade retorne ao consumo desaforado de bebidas alcòlicas e que estas a leven mesmo a agredir ás forzas de orde pública que ten a obriga de desaloxar os locais que incumpren as normas de convivencia cidadá non respectadas por aqueles que chegan á agresión dos axentes da orde?.
En teoría, o consumo per cápita e os consumidores que beben diariamente, ao igual que o consumo de alcol, van en descenso en España. Mesmo se constata a tendenza á sobriedade, ainda que a bebida segue moi presente.
Estamos afeitos a brindar por calquera cousa: en Galicia o brinde vai do ganchete co nacemento e da man da morte. O alcol ten un posto de privilexio nas casas, e a cultura vinícola acada aquí e nestas datas a condición de patrimonio inmaterial.
É certo, din os datos, que a botella é menos protagonista cada día na vida dos galegos; as estatísticas sinalan que os adolescentes beben menos ca seus pais ou irmáns maiores e que descende o número de xoves que se embebedan. Máis sendo así, que é o que move a condutas como as descritas anteriormente, protagonizadas por pais e fillos que poden
verse en leas que, supostamente, non se producirían de non estar o alcol polo medio?.
Segundo o secretario de Estado de Sanidade, “o consumo de alcol está tremendamente xeralizado no conxunto da poboación”. Máis do 92% dos españois entre 15 e 64 anos afirman telo tomado nalgún momento da vida, e máis da metade dí telo feito no último mes. Máis dun 10% de españois entre 35 e 54 anos recoñecen consumir diariamente alcol.
Algo máis que hábito social?.
