Algúns analistas mesmo se atreven a comentar que non se debería seguir indagando nin lembrando sobre algo que ocorreu e que, desgraciadamente, segue latente na nosa terra, o narcotráfico. Entón, algúns nos preguntamos se teriamos que prescindir dos libros de historia ou tamén non lembrar o holocausto nazi, nin a ditadura franquista, entre outros acontecementos, porque danan e molestan a algúns dos seus familiares, seguidores, nostálxicos ou cómplices.
Quen cura a dor a todas esas familias que perderon a algún dos seus membros, por culpa da droga? Somos tan hipócritas que continuamos criminalizando aos pobres drogodependentes e enxalzamos aos traficantes. O peor e a realidade é que o narcotráfico segue activo e en auxe en Galicia. Os “señores” da droga e os capos do narcotráfico seguen facendo gala da ostentación e a impunidade. Para eles todo vale con tal de vivir no luxo e a abundancia, sen dar un pau á auga e co mínimo esforzo, mentres seguen tecendo a tea de araña da mafia e a corrupción, a todos os niveis.
Foron moitos anos mirando para outro lado, mentres algúns membros de forzas de seguridade do estado, responsables políticos, certas empresas utilizadas como “tapadeiras”, entidades recreativas, culturais e deportivas beneficiáronse do diñeiro doado por estes capos e moitos veciños en xeral. Agora, a Xunta de Galicia, recoñece que o tráfico de drogas continúa florecendo en Galicia e van lanzar unhas campañas de sensibilización, cando o máis urxente e eficaz sería dispoñer dos medios materiais e humanos necesarios para loitar contra esas mafias.
