A Xunta de Galicia cala. O Goberno de Madrid garda silencio. Máis Lisboa fala claramente cando explica as consecuencias que vai ter para a pesca a creación na costa atlántica do país veciño dun parque eólico mariño de, inicialmente, 2.711 quilómetros cadrados de superficie.
Artes de pesca coma o arrastre de fondo ou aparellos de cerco e algúns de enmalle, son incompatibles coa produción de enerxías renovables mariñas, segundo as súas conclusións.
Sen pretendelo, Portugal da un aviso a Galicia que nace no seo das súas organizacións pesqueiras após a aprobación vai unha semana do Plan de Afección das Enerxías Renovables Offshore (PAER) acordado polo Consello de Ministros luso. Este Plan prevé a creación de zonas marítimas fronte á costa oeste do continente para a produción de enerxías renovables en alta mar, nunha aplicación especial en tecnoloxía eólica flotante.
A Resolución HO 19/2025 dese Consello de Ministros, recolle que “en canto ás preocupacións do sector pesqueiro co establecemento de zonas para a produción de enerxías renovables mariñas, en particular aquelas baseadas en tecnoloxía eólica, as nove reunións celebradas con asociacións e organizacións de pescadores máis afectadas pola aprobación do PAER, permitiron identificar as limitacións deste Plan na pesca e propor medidas de mínimis”.
A Resolución determina que as artes de pesca como o arrastre de fondo, os aparellos de cerco e algúns outros de enmalle, “son incompatibles” e “non poden realizarse” dentro das áreas nas que determinados proxectos de enerxía renovable de orixe ou ubicación oceánicas, “particularmente en parques eólicos instalados”, como sería o caso de Galicia.
Dí máis: os buques cuxa actividade estea restrinxida “non deberán trasladar a súa capacidade pesqueira a lugares nos que normalmente non pesca”. Para elo o PAER contempla medidas tendentes a minimizar os efectos destas limitacións na pesca comercial.
Á vista do lexislado polas autoridades portuguesas, semella indiscutible que a eólica mariña non vai ser inócua para o sector pesqueiro da zona cantábrico-noroeste, nomeadamente a costa da comunidade autónoma galega, onde máis forza fixo ata o de agora o devandito sector para tratar de evitar a instalación dos xa aprobados parques mariños eólicos e outros que poderían ser aprobados no futuro nos mesmos caladoiros nos que faena a cotío a frota de baixura ou do dia
