O Centro de Interpretación do Castro de Baroña acollerá este 8 de febreiro, a partir 18:00 h, a presentación do libro Conversas comigo mesma & Emociones arrítmicas, da autora Anxos Castro Parada.
O acto contará coa presentación de Alicia Martínez Maneiro, concelleira de Cultura do Concello de Porto do Son. Así como tamén de María Tembra, do grupo de música tradicional Lumieira; Xulio Gutiérrez, escritor e Anxos Castro Parada, autora do libro.
Editado polo selo madrileño Diversidad Literaria, o libro é unha escolma poética de 160 páxinas, en galego e en castelán, na que a autora recolle pezas escritas ao longo de toda a súa traxectoria vital, dende a nenez. Nesta colección vital, Anxos Castro defende a poesía como “a forma máis máxica de comunicación de cantas existen”, que, asegura, “permíteme expresar co que máis me gusta, coa pluma, plasmando sobre o papel todas as miñas emocións”. O libro, explicaba nunha entrevista recente con La Voz, “contén toda a miña traxectoria literaria, desde que tiña 13 anos ata a actualidade, pois sempre fun gardando os poemas que xurdían de todo aquilo que me inspiraba ou me emocionaba”.
