O Concello de Ribeira vén de poñer en marcha unha reorganización do tráfico na contorna dos Xulgados e das Casas Baratas co obxectivo de gañar fluidez na circulación e aumentar as prazas dispoñíbeis para o estacionamento de vehículos.
O alcalde, Luís Pérez Barral, informou de que as principais modificacións que se están executando hoxe mesmo consisten en que a Rúa Mariño de Rivera pasará a ser de dobre sentido de circulación, co traslado dos actuais estacionamentos da marxe esquerda á marxe dereita.
“Este cambio facilitará o acceso tanto aos Xulgados como á sede da Policía Local, mellorando a mobilidade na zona”, sinalou, engadindo que as rúas Barbanza, da Feira e Pedro Arias modificarán o seu sentido de circulación. Con esta nova configuración, as persoas residentes e usuarios e usuarias dos servizos públicos poderán optar por saír cara á avenida Miguel Rodríguez Bautista, como ata agora, ou pola avenida da Constitución. Esta última opción será posíbel “grazas á apertura dende hoxe mesmo ao tráfico da prolongación da rúa Barbanza, que discorre por detrás do novo Auditorio”, sinalou o rexedor.
