Este mércores 5 de febreiro o Concello de Ribeira adxudicou os traballos previstos para pór en valor a contorna do litoral e portuaria do núcleo de Ameixida, que na actualidade conforma unha superficie continua con pavimento de aglomerado asfáltico, destinada fundamentalmente ao estacionamento de vehículos, sen diferenciar espazos de tránsito rodado e peonil. O Concello explicou que ao abeiro desta iniciativa derrubarase unha construción para ampliar a superficie do proxecto. Habilitarase tamén unha rede de servizos como a recollida de augas pluviais, que será renovada, e unha contorna de espazos verdes e axardinados.
Segundo informou o alcalde, Luís Pérez, o obxectivo da actuación é crear un espazo de uso e desfrute da veciñanza na liña litoral e mellorar a integración ambiental e paisaxística desa zona.
Para “acadar a mellora da contorna litoral da Ameixida”, redistribuirase o espazo existente e substituiranse os pavimentos actuais por materiais novos, duradeiros e máis acordes coa paisaxe da zona, comentou o rexedor, engadindo que estamos ante “unha actuación integral coa que pretendemos crear puntos espazos de convivencia veciñal na parroquia de Castiñeiras porque ademais da Ameixida, estamos actuando tamén nos Mosqueiros”.
A obra contempla a renovación do pavimento de aglomerado, o derrube dunha construción duns 15 m2 aproximadamente e un valado pequeno, que se reconstruirá posteriormente.
Amais, renovarase a liña de pluviais existente mediante a instalación unha nova tubaxe de PVC de 315 mm de diámetro, cos seus correspondentes pozos de rexistro, arquetas sumidoiro e acometidas domiciliarias.
Para a pavimentación utilizaranse bordo de granito, lastra de granito abordado de longo libre (L) x 40 cm de ancho e 4 cm de espesor na zona de beirarrúa,formigón HM-25 pulido en cor a zona de rodaxe, celosías de formigón prefabricado combinado con céspede na zona de estacionamento.
Amais, dotarase á zona de novos elementos de iluminación e instalarase unha nova liña de alimentación a base de condutores de cobre.
Para seguir co plan de reverdecemento urbano posto en marcha polo goberno local, crearanse zonas axardinadas, rematadas con céspede natural e plantaranse sobreiras e arbustos.
Por último colocarase unha varanda de aceiro inoxidable sobre o muro que separa o bordo litoral, da praia da Ameixida.
O proxecto foi adxudicado por un importe total de 163.000 euros á empresa Excavaciones Nima S.L. financiado por fondos europeos NextGeneration e prevese unha duración de 3 meses.
