As corporacións locais non se dedican unicamente a preocuparse pola iluminación pública, polas estradas ou camiños, pola sanidade ou a educación pública, pola limpeza viaria, tamén teñen que promover e incentivar a cultura e o lecer entre a poboación. Así o Concello de Ribeira, a través da Concellería de Cultura aposta polo promotor de espectáculos ribeirense, José Antonio Fernández Paz, para traer este mes de febreiro ao Auditorio Municipal o gran espectáculo musical Remember Queen, cos seus famosos grandes éxitos de Queen, para que os veciños de Ribeira e a comarca do Barbanza en xeral, afeccionados á boa música, non teñan que desprazarse ás grandes cidades para gozar do xenio de varios estilos musicais como o rock, pop, blues e mesmo o heavy metal.
É moi importante que a cidade centenaria poida contar con este tipo de actuacións musicais que eran máis propias de cidades como Vigo, Santiago ou Coruña. Os veciños agradecémolo, como non podía ser doutra maneira e confiamos en que se sigan promocionando.
Tamén hai que lembrar que este promotor de espectáculos foi o encargado da instalación da pista de xeo, durante estas pasadas datas do Nadal, á que acudiron centenares de persoas.
Este mesmo mes de febreiro, concretamente o día 22, estará tamén en Ribeira o famoso e recoñecido internacionalmente ilusionista e mago, Dani Polo, nunha actuación aberta para todos os públicos. Os máis pequenos e non tan pequenos agradecerémolo porque pasaremos unhas horas de lecer e goce.
