O Grupo Municipal do Partido Popular no Concello de Ribeira vén de emitir un comunicado no que se mostra crítico coa xestión do tripartito no Goberno local, co alcalde Luís Pérez Barral, xestión que cualifica de “nula nos últimos 18 meses”. Tamén sostén que o Executivo “ademais de non propoñer nada novo, actúa totalmente á inversa do que predicaba dende a oposición”. Para o PP, o máis recente exemplo desta “falta de criterio do alcalde ribeirense” pódese ver “coa licitación do contrato de monitorado do servizo de deportes para os vindeiros 4 anos e que está cifrado en 2,4 millóns de euros”. Neste punto, o PP recoñeceu a súa sorpresa “logo das reiteradas críticas que, nas anteriores lexislaturas, lanzaban desde a bancada do BNG cualificando este contrato de privatización e afirmando que as contas realizadas polos nacionalistas naquel entón poñían de manifesto o sobrecusto que supoñía esta fórmula fronte á creación dos postos públicos”.
O comunicado remata deste xeito: “Unha vez máis, o goberno do BNG ten que dar marcha atrás nas súas iniciativas demostrando que o traballo realizado polos populares ía no camiño e na senda correcta tanto non eido executivo coma no económico”.
