A cantante galega MJ Pérez anunciou que vai iniciar a súa xira de concertos do 2025 na Pousada da Galiza Imaxinaria, en Boiro, será o domingo 2 de febreiro, con apertura de portas ás 18.30 horas. Será concerto especial por ser o primeiro deste novo ano, mais tamén especial por ser a primeira vez que a cantautora actúa na sala que rexenta Suso Santamaría, referente galego e estatal no panorama de escenarios musicais.
Con máis de 10 anos de carreira ás costas, MJ fixo saber que na Pousada achegará un repaso do máis representativo da súa carreira, mais no que tamén tocará en primicia algún tema de adianto do seu novo álbum, previsto para finais deste ano, mais do que irá publicando adiantos ao longo dos próximos meses.
MJ Pérez, nada en Arzúa, é unha das voces presente no panorama actual da música galega. Inicia o seu percorrido no 2013 e acumula máis de 200 concertos por Galiza e Portugal. Suma xa 4 álbums e diversos singles e colaboracións con outros artistas.
Ao longo de todos estes anos, MJ Pérez emprende un camiño de constancia e moita música que logo lle trouxo froitos e recoñecementos coma un 2º posto nos Premios Narf 2018 ou un 1º posto no Xuventude Crea 2019. Ademais de ser finalista dos Premios Opinión e dos Premios Martín Códex da Música, estes últimos ata en 3 ocasións, levando o premio no 2021 na categoría de Canción de Autor.
O ano pasado fixo unha xira especial para celebrar os seus 10 anos de carreira e este ano prepara novo disco, que virá cargado de diversas colaboracións e no que Portugal terá maior presenza.
Neste directo MJ Pérez fará un repaso polos seus temas destacados e interpretará ao vivo algún adianto do que virá.
