Se houbo ata hoxe un home recoñecido na televisión galega como un dos máis populares presentadores de programas (xunto con X.R. Gayoso), este foi Xosè Manuel Piñeiro, profesional cun gran carisma primeiro na radio e posteriormente na tele, que aportou ao audiovisual un modo de facer que o identificaba e que non todo o mundo acada porque, sen dúbida, marcaba co seu carimbo persoal cada un dos produtos que ofrecía ao público.
Piñeiro foi o pai e a nai do programa “Supermartes”, polo que os espectadores da TVG
o rebautizaron “Superpiñeiro”, sobrenome que revalorizou o ser específico do presentador que, no ano 2020, recibía da Xunta de Galicia a Medalla Castelao.
O emblemático presentador alaricano faleceu o mércores e hoxe pola tarde celebrarase na igrexa de Santiago da súa vila natal un funeral polo seu eterno descanso, previo á incineración que se realizará na intimidade familiar. Ata na esquela, ao parecer por el redactada, Superpiñeiro deixou a marca indeleble da súa personalidade. Un mielanoma que padecía dende 2018 foi o causante da súa morte aos 68 anos.
De Piñeiro pode dicirse que tiña un estilo propio que marcou un xeito de entreter á audiencia e que, en boa medida, cadraba cos gustos maioritarios da audiencia da televisión pública galega durante os anos que exerceu coma presentador e que, a posteriori, outros presentadores noutros medios adoptaron coma de seu.
