O prestixioso cómico Luis Álvaro incluíu Ribeira na súa exitosa xira polo territorio estatal. A cita en Santa Uxía será o vindeiro 7 de febreiro, no Auditorio Municipal, grazas ao acordo de colaboración entre o Concello e a promotora local de eventos culturais Aquelarre. A presentación estivo arroupada pola concelleira de Cultura, Antía Alberte, e o promotor local Jandro Ayaso.
A edil manifestou que a programación do Auditorio de Ribeira está composta polas actividades que propón o propio departamento de Cultura e tamén de propostas de carácter privado ou de promotoras culturais, “empre que se dote dunha calidade e un encaixe na programación deseñada polo propio departamento de Cultura do Concello”. A edil aproveitou para dar os parabéns pola iniciativa á promotora Aquelarre.
Pola súa banda, o promotor deu as grazas á Concellería de Cultura pola dilixencia en tramitar todo o necesario para facer realidade o espectáculo: “Chegouse un pouco tarde, tivemos coñecemento de que Luis Álvaro estaba en Galicia e fixemos unha xestión moi rápida para poder traelo a Ribeira”, afirmou Ayaso, quen tamén fixo un percorrido pola traxectoria do cómico: “Consideramos que é unha aposta arriscada porque é un humor que non é para todo o mundo, é inédito pola nosa zona; é un cómico que consideramos que está indicado para xente entre os 20 e os 50 anos”. Jandro, que animou á veciñanza a presenciar o espectáculo o vindeiro 7 de febreiro, lembrou que Luis Álvaro presenta shows únicos no seu estilo, onde o humor absurdo entrelázase cunha aguda observación da vida cotiá, nos que o cómico desprega todo o seu repertorio de situacións inesperadas, xogos de palabras enxeñosas e reflexións que desafían a lóxica, convidando ao público a unha viaxe hilarante pola súa peculiar visión do mundo.
Día e hora
Venres 7 de febreiro ás 21.00 h (apertura de portas ás 20.30 h)
Entradas
No Concello fisicamente e na web Ataquilla.com cun prezo de 12,00€ máis gastos de xestión
Lugar
Novo Auditorio Municipal
Duración
Aproximadamente 60-70 minutos
Público Obxectivo
Adultos de todas as idades que gocen do humor intelixente, o sarcasmo e os xiros imprevisíbeis.
Recomendado para maiores de 16 anos.
Temáticas Principais:
– Absurdo e surrealismo na vida cotiá.
– Situacións inesperadas e o seu impacto.
– Relacións humanas e os seus paradoxos.
– Observacións hilarantes sobre a sociedade
