A Xunta anunciou este 13 de xaneiro que vai habilitar este ano hospitais de día oncohematolóxicos nos centros hospitalarios da rede sanitaria pública de Barbanza, en Ribeira, e de Cee. Para este fin o Goberno galego destinará un total de 1,4 millóns de euros ás obras das novas instalacións. O maior esforzo prevese no Hospital Público de Barbanza, onde é preciso construír un novo espazo para albergar a prestación deste servizo.
Segundo se recolle no informe da Consellería de Sanidade, a previsión é atender entre ata 640 doentes ao ano en tratamento no hospital de día de Barbanza, tendo en conta a taxa de incidencia do cancro e que a poboación deste distrito é de 64.000 habitantes.
Polo que atinxe ao distrito sanitario de Cee, a previsión é atender ata 365 doentes ao ano, cunha poboación de referencia de 36.000 persoas.
A creación destes hospitais, explica a Consellería de Sanidade, “optimiza os recursos sanitarios e aproxima servizos de calidade e complexos á contorna da cidadanía, mellorando a calidade de vida dos pacientes e os seus familiares”. Amais “posibilitará o acceso a tratamentos especializados para doenzas oncolóxicas e hematolóxicas como quimioterapia e transfusións, sen necesidade de desprazamento nin de hospitalización prolongada”.
Sanidade engade que esta iniciativa “mellorará a calidade de vida dos pacientes, ao ofrecer tratamentos ambulatorios, posto que os doentes poden recibir atención médica sen interromper significativamente a súa vida diaria, podendo volver a casa no mesmo día”.
A Xunta tamén salienta que “os hospitais de día posibilitan unha maior eficacia, cunha atención integral e continuada, permitindo un enfoque multidisciplinar do tratamento do cancro, onde os pacientes poden recibir atención de oncólogos, hematólogos, persoal de enfermería e outros profesionais nun só lugar, o que facilita un seguimento máis próximo e unha atención máis coordinada”.
