Heredeiros da Crus, histórica e sobranceira banda rockeira do Barbanza, fixo coincidir (e non por casualidade) a chegada do Nadal, e do día de Noiteboa, co lanzamento do tema que presenta o seu novo álbum, que publicarán o vindeiro 21 de febreiro. Trátase de Convensido, un lanzamento simbólico que xa podemos ver e escoitar no Youtube, descrito pola banda como un “agasallo de Papá Noel”, que marca a volta do grupo tras máis dun ano de parón.
O novo single aborda, con humor e retranca, a historia dun pai e un fillo que se enrolan no mar. A canción explora a dureza da vida mariñeira a través da particular visión dos Heredeiros, mantendo a súa esencia irreverente malia os anos transcorridos dende o seu debut no ámbito musical. “Para nós, este lanzamento é unha maneira de conectar de novo coa nosa xente tras un ano de descanso. É o primeiro capítulo dun disco no que seguimos explorando novas historias, pero sempre mantendo a nosa esencia”, explican desde a banda.
A historia que guía o videoclip, dirixido por Xaime Miranda e gravado na Cidade da Cultura de Santiago de Compostela, trasládanos a un escenario futurista e disparatado. Un grupo de médicos científicos somete a unha serie de probas rigorosas a varios candidatos para certificar a súa aptitude. Despois de superar exames médicos complexos, só un aspirantes será seleccionado para a proba final: enfrontarse a Bestia, unha arma letal creada polos implacábeis médicos.
Este lanzamento marca o inicio dunha das etapas máis intensas na traxectoria do grupo. Ademais do novo disco, Heredeiros da Crus xa teñen confirmadas as primeiras datas da súa xira 2025, que inclúe actuacións en festivais destacados como o Resurrection Fest (Viveiro) e o Silfest (O Barco de Valdeorras). A banda promete un dos directos máis potentes e ambiciosos da súa carreira, “con novas sorpresas por desvelar”, adiantan.
