O noso compañeiro José Manuel Pena comparte con nós a carta que lle vén de enviar a Altri sobre o proxecto de macrocelulosa de Palas de Rei:
Por medio da presente, como veciño da zona norte da ría de Arousa en Galicia preocúpame, xunto con outras decenas de miles de galegos, a posible instalación dunha celulosa da empresa Altri na localidade galega de Palas de Rei. Cremos que pode ocasionar un dano irreparable á contorna natural e a riqueza agrícola, gandeira, marisqueira e pesqueira da nosa terra.
A empresa, debería sopesar as súas consecuencias e elixir outra localización, vendo a clara e evidente oposición veciñal de decenas de miles de persoas de Galicia que non queremos nin desexamos industrias contaminantes. As multitudinarias mobilizacións públicas, a oposición de entidades privadas e públicas, organizacións políticas, organizacións sindicais, movementos e asociacións ecoloxistas, plataformas veciñais, organizacións pesqueiras, gandeiras e campesiñas así moitos e moitos particulares manifestamos a nosa total oposición.
Os responsables da Xunta de Galicia, publicamente, desexan industrias para garantir postos de traballo pero iso non pode ser a calquera prezo. A emigración pode ser moito maior, cando se vexan as negativas consecuencias no medio ambiente e na riqueza dos nosos montes e costas galegas. Grazas pola vosa atención.
