O PSOE de Rianxo emitiu un comunicado no que traslada á veciñanza a súa preocupación ante o que o grupo considera “unha perda de oportunidades para mellorar o noso municipio mediante subvencións”. No comunicado comentan que “no último ano de lexislatura, Rianxo deixou de percibir 150.000€ en subvencións directas e perdeu a posibilidade de optar a axudas adicionais por un importe aproximado de ata 100.000€. Nun plano máis concreto, o PSOE sinala que a alcaldía “non solicitou unha subvención para a promoción económica de Rianxo en 2024” e que grazas a esta axuda “Rianxo puido ter recibido ata 40.000€ para dinamizar e promover o noso comercio”.
No comunicado apuntan que son necesarios cambios na área municipal adicada a estes obxectivos, modificándoa para mellorar o seu funcionamento.
“Desde o grupo socialista, consideramos que cada euro que deixa de captar representa unha oportunidade perdida para mellorar servizos, infraestruturas e calidade de vida no noso municipio; por iso, facemos un chamamento ao equipo de Goberno para que redobre esforzos na planificación e xestión das solicitudes a programas de axuda autonómicos, estatais e europeos”.
Na carta publicada a agrupación destaca que “o éxito na captación de subvencións require planificación, coordinación e unha proactividade constante para identificar e solicitar fondos dispoñíbeis, polo que propoñemos reforzar as áreas técnicas con formación específica e recursos que permitan presentar proxectos sólidos e competitivos, co obxectivo de garantir que Rianxo non só non perda oportunidades, senón que sexa un exemplo de boa xestión de recursos externos”.
O PSOE de Rianxo reitera o seu compromiso de “colaboración para traballar xuntos na procura de solucións que aseguren que no futuro non se repitan estas perdas”.
