A Asociación Rianxeira de Empresarios (ARE) vai festexar o Nadal ao grande, ben a través da súa Campaña de Nadal, ben mediante o programa de actividades de dinamización que ten programado.
Na súa Campaña de Nadal a patronal rianxeira premiará as compras de proximidade que se fagan nos establecementos asociados entre o 9 de decembro e o 7 de xaneiro. Os clientes recibirán rifas numeradas coas súas adquisicións, e cada rifa é unha oportunidade para gañar un dos 16 vales de compra que a ARE mobiliza na campaña, por valor de 50 euros (para gastar nos negocios locais participantes). O sorteo destes 800 euros realizarase o 8 de xaneiro de 2025 e publicarase a listaxe de premiados o 16 de xaneiro na web da ARE e redes sociais.
“Ao participar”, explica a patronal rianxeira, “non só teremos a oportunidade de gañar premios, senón que tamén estaremos apoiando o comercio local, fortalecendo a nosa comunidade e contribuíndo á economía de Rianxo; mercar no comercio de proximidade é apostar pola calidade, a atención personalizada e polos nosos veciños”. As bases legais da campaña están subidas á Rede.
Esta iniciativa está co-financiada pola Xunta e subvencionada pola Deputación da Coruña.
Máis actividades
Ademais nestas festas a ARE énchese de espírito de Nadal para “ofrecer actividades únicas e divertidas que farán as delicias de toda a familia”. A axenda inclúe inchábeis, xogos e “moitas sorpresas” nas diferentes localizacións do concello (en Taragoña, en Rianxo, en Asados) ao longo destas festas. A nivel máis concreto, haberá inchábeis de diferentes tamaños e temáticas; atraccións sorprendentes, como un unicornio mecánico ou unha parede interactiva; unha bóla de neve xigante, ideal para inmortalizar as festas cunha foto máxica; ou adobíos de Nadal xigantes “que crearán o ambiente perfecto para celebrar en familia”. As actividades están pensadas para todas as idades, desde os máis pequenos ata os maiores da casa.
Esta axenda está concibida para convidar a veciños e visitantes a apoiar os negocios locais, favorecendo que a afluencia de xente impulse a visita aos comercios de proximidade: “En Rianxo, atoparemos os mellores produtos e o trato máis persoal, mentres contribuímos a fortalecer a nosa comunidade”.
