Compromiso por Galicia (CxG) celebrou en Ourense un Consello Nacional Extraordinario, designando a Óscar Casais como o candidato da formación á Presidencia da Xunta de Galicia, a proposta feita polo secretario xeral, Piñeiro Docampo.
Casais, quen tamén é cabeza de lista pola provincia da Coruña, manifestou, xa como candidato, que “recibo o encargo do CN, coa mesma ilusión e gañas de traballar coas que me sumei no seu día a CxG. O proxecto que mellor reflexa a realidade da sociedade galega. Faremos unha campaña digna centrada en ofrecer solucións aos problemas dos galegos e galegas.”
Pola súa parte, Piñeiro Docampo expresou que “CxG viña propondo unha liña de unidade de acción no eido das forzas galegas dende o 28A do 2019. Non puido ser, En Marea desfíxose politicamente e o BNG decidiu falar soamente coa súa esquerda, unha esquerda rupturista. Nese escenario CxG non renuncia a seguir traballando dende a teima de que o noso proxecto non se asenta en botar a ninguén, senón en que Galicia avance.”
Óscar Casais exerce como xefe do servizo de bombeiros do parque comarcal de Ribeira e xa se presentara por CxG á Alcaldía ribeirense nos comicios municipais de 2019, sen chegar a acadar representación na corporación municipal, mais continuando vinculado ao partido.
