Rianxo foi estre luns 25N un clamor contra as agresións machistas, co gallo do Día Internacional para a Eliminación da Violencia Contra as Mulleres. Diante do Consistorio focalizouse o acto central do día. Alí, membros da Corporación Municipal e traballadores e traballadoras do Concello, xunto con veciños e veciñas, participaron na lectura dunha Declaración Institucional con motivo do 25N. Gardouse tamén un minuto de silencio polas mulleres asasinadas no conxunto do Estado español no que vai de ano. O Concello acompañou este acto subindo á web municipal a dita Declaración.
A axenda prosegue
O Concello de Rianxo, a través da Concellería de Política Social, organiza as xornadas Camiñando cara a igualdade no marco da conmemoración do Día Internacional da Eliminación da Violencia contra a Muller. A axenda comezou este venres 22 coa representación da obra Soa, ás 20.30 horas no Auditorio de Rianxo. Proseguiu este luns co dito acto institucional na Casa do Concello e continuará este martes 26 de novembro cun faladoiro con Montse Fajardo, autora de Invisibles. Será ás 19.30 horas no Auditorio Municipal. Montse Fajardo, xornalista e escritora de Vilagarcía, falará en Rianxo das diferentes facianas da violencia machista dende o punto de vista de diferentes vítimas.
O xoves 28 celebrarase un obradoiro anti-agresións no CEP Brea Segade, baixo o epígrafe Promoción da igualdade e o bo trato. Será ás 19.00 horas. Abordarase a relevancia da igualdade e o bo trato en todos os ámbitos da vida, dende as relacións familiares até o ambiente familiar.
A axenda do 25 en Rianxo rematará o venres 29, co obradoiro Autoestima, benestar e saúde con perspectiva de xénero. Será nas Escolas Vellas da Atalaia, ás 19.00 horas. A través desta actividade, as persoas participantes descubrirán como as normas de xénero inflúen na súa autoimaxe e benestasr.
Organiza o Concello de Rianxo ao abeiro do Pacto do Estado Contra a Violencia de Xénero.
