A primeira edición da Mostra de Teatro de Porto do Son segue adiante con máis funcións en novembro. Esta fin de semana (o sábado 23 de novembro) representarase o espectáculo Running de De Ste Xeito. Será na Casa da Cultura de Porto do Son a partir das 21.00 horas. As entradas están xa á venda na oficina da Área de Cultura en horario de luns a venres de 9:00 a 14:00 horas. Por certo que ás 21.00 horas pecharanse as portas do auditorio.
Running é “unha suorenta comedia” protagonizada por Stephy Llaryora e Sergio Macias, que terán que suar a camiseta para meterse na pel de todos os personaxes desta vertixinosa comedia. A dramaturxia e a dirección corren a cargo da escritora e actriz rianxeira Esther F. Carrodeguas.
Organiza o Concello coa colaboración de Cultura da Deputación da Coruña / Deputación da Coruña.
Sinopse
Xulia e Román acábanse de coñecer. Fillas e fillos de parellas anteriores. Nais divorciadas. Avós na residencia. Adolescentes na idade do pavo. O pequeno coa crise dos 8. Os maiores coa dos 40, coa dos 50, coa dos 60. Clases de ioga para liberar a tensión, patinaxe artística os luns, danza jazz os martes. E ser taxista. Das fillas, dos fillos, das fillas dos demais, do pai, da nai, da avoa, dos curmáns. E os deberes. Os deberes do colexio e o resto dos deberes. Deberes e obrigas. Coidar de todo e de todos menos dun mesmo. Como facer que as axendas cadren? E por outra banda: de verdade quero empezar algo novo que poida supoñer máis deberes e menos pensar nun mesmo?
