O dereito á folga está recoñecido no artigo 28 da Constitución española, para a defensa dos dereitos dos traballadores e iso é o que están a exercer, de maneira libre e voluntaria, a maioría das traballadoras da empresa ribeirense de “Congelados Angel Lopez Soto / Alfrío”.
Como pode ser que unha traballadora, coa categoría de auxiliar de fábrica (despois de levar traballando na empresa máis de 15 anos) pode estar a percibir menos do salario mínimo interprofesional? Non é normal e moito menos que, despois de tanto tempo de permanencia na mesma empresa e no mesmo posto de traballo, sexan mantidas coa mesma categoría profesional para non ter que aumentarlles as retribucións. Pensemos que o 90% do persoal da empresa son mulleres traballadoras, moitas delas con responsabilidades familiares.
O recoñecemento da categoría profesional, as quendas de traballo así como a porcentaxe aplicable á situación da Incapacidade Temporal son algunhas das súas xustas reivindicacións. A pesar dos seus baixos salarios, nunha empresa de conxelados, con humidades e manipulación de pesos importantes, as mulleres están dispostas mesmo a perder diñeiro pero a continuar coa folga porque saben que loitan e demandan o que en xustiza lles corresponde e que a empresa as tivo esquecidas, durante tanto tempo.
Unha gran parte dos convenios colectivos de empresa xa teñen recoñecidos a porcentaxe do 100 por cento do salario, nos casos de baixa por enfermidade e aquí a empresa négase á devandita aplicación así como que a maioría das mulleres figuran, coa categoría de auxiliares de fábrica (algunhas con 20 anos de traballo na fábrica), con salarios duns 1.000 euros mensuais, aproximadamente ao aplicarlles o salario basear e o complemento de antigüidade senón nin chegaban a esas cantidades. En pleno século XXI, é indignante que haxa empresas que exploten dese xeito ás súas traballadoras. Adiante, a loitar…
