A deputada do Bloque Nacionalista Galego, Rosana Pérez, preguntou na Comisión 8.ª, Pesca e Marisqueo, polas medidas que se van a tomar dende a Consellería do Mar, para a recuperación, “antes de que sexa demasiado tarde”, dos bancos de libre marisqueo da ría de Arousa. Explicou que “logo das campañas desastrosas dos últimos anos no ano 2023 a propia Consellería tivo que decretar o seu peche apenas tres meses despois de ter comezado, e este ano, tamén apenas 10 días despois de comezar, o sector xa estaba practicamente sen expectativas e vendo, outra vez, o fracaso que se lles viña enriba”.
A deputada nacionalista criticou á Xunta por, na opinión do BNG, “eludir as súas responsabilidades e culpar, nun primeiro momento, á choiva, á temperatura da auga, á baixa salinidade, e agora mesmo trasladan a responsabilidade á Asociación Rañeiros da Ría”. Rosana Pérez cualificou de “bastante cobarde” a actitude da consellería, pois “é a que ten as competencias exclusivas”, dixo, engadindo que o BNG leva manifestando “de forma insistente durante estes últimos cinco anos, que a Consellería tome cartas no asunto”. E engadiu que “mesmo había confrarías na propia ría que lle solicitaron tomar man deste asunto, porque se vía claramente, que a Asociación de Rañeiros non estaba funcionando”.
“Temos outro culpábel máis” apuntou a deputada, despois de ter escoitado á directora. Trátase das axudas da consellería que dende o BNG sempre se criticou por ter “unha execución nefasta e o seguimos mantendo até que se demostre o contrario e que dende a consellería cualifican de “moi complexas”, sinalou a parlamentaria da Pobra, criticando que “dende a Xunta non tomasen medidas antes para solucionar a complexidade da tramitación e recrimina que as familias que se adican ao sector tivesen que esperar nove meses para cobras este subsidio”.
O BNG instou ao Goberno do Partido Popular “a acometer as medidas necesarias para tratar de reverter a situación actual, a cal están a vivir os traballadores e traballadoras deses bancos despois de anos reclamándolle medidas de calado e, finalmente, sen que se teña posto en marcha ningunha”.
