O alcalde de Boiro, José Ramón Romero, e o concelleiro de Deportes, Marcos Fajardo, asinaron na mañá deste 30 de outubro cadanseu convenio de colaboración co Club de Tenis Boiromar, o Club Deportivo Malamía e o Club Ciclista Barbanza.
Por parte do Club de Tenis asinou o acordo a súa presidenta, Ana Virginia Simal Orellano. A axuda económica irá destinada a financiar os gastos de arbitraxes, material deportivo, desprazamentos e aloxamentos; gastos de xestión publicitaria, gastos das inscricións en competicións oficiais e aqueles derivados da participación de deportistas no master provincial de Tenis 2024.
Daniel Torrado García, presidente do CD Malamía, asinou o convenio de colaboración coa entidade, que estará destinado a gastos xerais de arbitraxes, material deportivo, desprazamentos, aloxamento, gastos de xestión publicitaria, gastos de inscricións en competicións oficiais e participación de deportistas no Soño Olímpico.
Por parte do Club Ciclista Barbanza foi tamén o seu presidente, Ricardo Riveiro Núñez, quen asinou o convenio que, neste caso, está dirixido a financiar os gastos de arbitraxes, material deportivo, desprazamentos, aloxamento, gastos de xestión publicitaria e gastos de inscricións en competicións oficiais.
Preto de 30 clubs e entidades deportivas obteñen unha subvención nominativa que ten como obxecto sufragar os gastos xerais dos propios clubs no que o Concello de Boiro destina un importe que ascende aos 466.750 euros euros do orzamento municipal.
