Este 18 de outubro celebrouse en Ribeira a presentación desta vixésimo sétima edición da Aula Galega de Saxofón. Participaron no acto a concelleira de Educación, Cruz Rivadulla e o profesor de saxofón do Conservatorio, José Fungueiriño, que ademais é o coordinador e responsábel destes cursos.
Rivadulla salientou a calidade da Aula e das audicións tanto de alumnado como de profesorado que son abertas para toda a veciñanza: “Eu persoalmente vivino o ano pasado e podo dicir que foi fantástico”, sinalou a concelleira.
Na presentación deuse a coñecer o programa do primeiro cuadrimestre (de outubro a xaneiro) que vai constar de
catro encontros con seis profesores, cinco saxofonistas e un pianista.
Este ano a aula vai contar con oito encontros de outubro a maio con saxofonistas que “aínda que novos teñen unha calidade e recoñecemento a nivel nacional e internacional”, sinalou a concelleira.
Fungueiriño resaltou que os dous profesores que van a impartir estes cursos foron alumnos dos mesmos: “Estamos falando de Xabier Casal (que impartirá en outubro e decembro) oriúndo de Santiago e que actualmente traballa no Conservatorio Superior de Música das Illas Baleares, e Adrián Pais, que impartirá as clases no mes de novembro e que é natural de Taragoña”.
Fungueiriño sinalou que “cabe destacar esta faceta do aula que sirve tamén como integradora de antigos alumnos e que fan de modelo para os novos estudantes”.
Para rematar falou dos grandes intérpretes que se achegarán a este curso: Carlos Ordóñez, Xavier Larsson e Takahiro Mita.
O seminario Aula Galega de Saxofón ao igual que o ano pasado vai constar de dous cuadrimestes. É unha actividade que pon ao Conservatorio de Ribeira como referente doutras propostas que fóra de Galicia se puxeron en marcha o ano pasado.
O alumnado usuario da actividade é na súa maioría estudantes do grao profesional.
Das quince prazas ofertadas, as cales se cubriron todas, seis corresponden a alumnado do Conservatorio de Ribeira e as outras nove a outros conservatorios e escolas de música da xeografía galega: Rianxo, Valga, Pontevedra, Santiago, Silleda, Sanxenxo…
En canto a financiamento, a Aula Galega de Saxofón está sustentada nunha parte polos usuarios, outra parte sae do orzamento do conservatorio e tamén mencionar os colaboradores como Musical Pontevedra, Yamaha e Roi Barros Luthier que tamén foi alumno do aula e que agora fai unha gran labor, ademais de saxofonista, como reparador de saxofóns.
