Ribeira fará este sábado, da man das Amas de Casa e coa colaboración do Concello, unha homenaxe ás vítimas da COVID-19. Así o confirmaron o alcalde, Luís Pérez, a presidenta das Amas de Casa, Puri Cores e a socia Pili Doval, quen animaron á veciñanza a participar no acto de lembranza que terá lugar este sábado día 19 de outubro ás 18:30 horas da tarde no monumento ás vítimas situado na praza de España.
Puri Cores reflexionou sobre a pandemia dicindo que “parece que nos sona moi lonxe pero a min persoalmente impactoume moito e penso que non serei a única, aínda teño esas imaxes gardadas na retina” e asemade engadiu que houbo “xente que morreu soa, que non puido ter á súa familia neses momentos, familias que descoñecían onde tiñan os seus seres queridos…, penso que o mínimo como persoas e humanos é ter un recordo e que saiban que para nós sempre estarán na nosa memoria e no máis profundo do corazón”.
Pola súa banda Luís Pérez sinalou que dende o Concello de Ribeira “sumánonos a esta homenaxe promovida pola asociación Amas de Casa, un evento breve ao que animamos á poboación a participar nel porque queremos lembrar de maneira especial a tódalas persoas que faleceron na época do coronavirus”.
O rexedor engadiu “que parece que a pandemia pasou fai moito tempo pero na nosa memoria seguen estando presentes esas persoas que faleceron soas”. Pérez Barral tamén destacou que durante a pandemia “vimos o mellor do ser humano axudándonos mutuamente a levar adiante a soidade do confinamento”; a pandemia tamén demostrou que o ser humano “é capaz de facer cousas extraordinarias en tempo de dificultades e isto e algo que tamén temos que salientar nesta homenaxe e lembranza de todas esas persoas que faleceron na pandemia e que tristemente non nos poden acompañar”.
