O alcalde de Boiro, José Ramón Romero, asinou este xoves 17 de outubro os primeiros convenios do ano 2024 con entidades deportivas o municipio. Acompañado do concelleiro de Deportes, Marcos Fajardo, formalizouse a colaboración co Club de Piragüismo Rías Baixas e o Club de Natación Boiro.
O presidente do Club de Piragüismo Rias Baixas, Sergio Pérez Treus, asinou o convenio para esta tempada, unha subvención de 8.500 euros que o club vai destinar para sufragar os gastos de arbitraxes, material deportivo, desprazamentos, aloxamento, gastos de xestión publicitaria e gastos de inscricións en competicións oficiais.
Tamén asinou esta mañá o convenio o presidente do Club de Natación Boiro, Rafael Pérez García, que investirá a subvención de 8.500 euros para cubrir os gastos da Travesía a Nado Illa da Bensa así como outros gastos xerais de arbitraxes, material deportivo, desprazamentos, aloxamentos, probas deportivas, gastos de xestión publicitaria e gastos de inscricións en probas oficiais.
Preto de 30 clubs e entidades deportivas obteñen unha subvención nominativa que ten como obxecto sufragar os gastos xerais dos propios clubs no que o Concello de Boiro destina un importe que ascende aos 466.750 euros euros do orzamento municipal.
