O Ministerio de Política Territorial e Memoria Democrática comunicou este venres ao presidente da Xunta, Alfonso Rueda, o inminente envío do borrador do documento que servirá de base para concretar a transferencia a Galicia da competencia de xestión do litoral.
Segundo explicou o propio Rueda na apertura da xornada ‘Cuestións do litoral. Visións a partir da doutrina constitucional de 2024’, organizada pola Universidade de Vigo, este documento será o punto de inicio deste proceso, que se abordará na Comisión Mixta de Transferencias.
Tras apuntar que “outras Comunidades, cunha redacción estatutaria practicamente igual á de Galicia” obtiveron o compromiso de prazos para esta transferencia, Alfonso Rueda sinalou que “todo aquel a quen llo permita o ordenamento xurídico está no seu dereito para reivindicala”.
“O que reclamamos é o mesmo trato”, proclamou o titular da Xunta, quen manifestou o seu desexo de que ese borrador que envíe o Goberno nuns días “sirva de documento de traballo rápido” para que se poida constituír a Comisión Mixta “rapidamente” e poñerse “a traballar”.
Así mesmo, pediu que se dote a Galicia “de medios” para “poder exercer ese dereito”, avalado polo Tribunal Constitucional, e “poder ser eficaces”.
Durante a súa intervención, Alfonso Rueda defendeu a determinación do goberno galego de “tomarse en serio a ordenación do litoral”, e puxo en valor a lei aprobada polo Parlamento autonómico, recorrida polo Goberno ante o Tribunal Constitucional, órgano que acabou avalando a norma.
Así, subliñou que a Xunta non pretendía outra cousa que permitir a Galicia “exercer a súa capacidade” desde o “convencemento de que, desde aquí, podíase facer mellor”, e cummpliendo co ordenamento xeral, coa Constitución e con todo o que debe ser observado”.
“Ese foi o espírito que inspirou a nosa lei. Tentamos falar co Goberno. Eu tenteino persoalmente, había compromiso de diálogo, ningunha intención de confrontar”, proclamou Rueda, que engadiu: “Isto acabou nun recurso ante ao Tribunal Constitucional, ao que agradezo que fixese o seu traballo”.
Eólica mariña
Por outra banda, tras insistir en que a preservación do medio ambiente debe compatibilizarse co desenvolvemento económico e de emprego no territorio, referiuse ao paso dado polo Executivo central para regular “por fin” a actividade eólica mariña.
O presidente da Xunta incidiu en que será “perfectamente compatible” preservar os dereitos do sector pesqueiro con “as oportunidades que todo iso pode supoñer”. “Pido sentidiño e garanto a intención da Xunta de preservar a legalidade, e a decidida determinación de tentar que as actividades económicas, a riqueza e as oportunidades que chaman á porta queden en Galicia”, sentenciou.
