O Concello de Rianxo volve a colaborar coa asociación Solidariedade Galega co Pobo Saharauí (SOGAPS) nunha campaña solidaria de emerxencia. Desta volta solicítase axuda urxente en relación coa crise humanitaria provocada polas intensas choivas, que derrubaron numerosas infraestruturas e obrigaron a case 3.000 persoas a ser evacuadas das súas casas. Tamén foron destruídos centros educativos e médicos, polo que practicamente todo o material quedou inutilizábel, explican dende a asociación.
Desde SOGAPS engaden que a súa intención é mercar material sanitario e viaxarán aos campamentos o día 24 de outubro. Porén, solicitan toda a colaboración posíbel para axudar a estas familias nestes momentos de necesidade urxente. Todas aquelas persoas que desexen colaborar, poden facelo a través dun donativo económico. O número da conta bancaria da asociación é: ES48 2080 5056 1130 4006 3331.
