O Concello de Ribeira segue avanzando na mellora dos servizos para a veciñanza e para as persoas visitantes, por exemplo coa adxudicación do estudo integral para a nova sinalización do municipio, proxecto encadrado no marco do Plan de Sustentabilidade Turística de Ribeira. Neste contémplase a elaboración dun plan que “mellore a imaxe xeral da contorna e que transmita unha información clara, comprensíbel e veraz á veciñanza pero tamén ás persoas visitantes”.
O equipo de Goberno lembra que “actualmente non existe unha sinalización clara e definida que facilite ás persoas chegar a diversos puntos de interese do municipio, por iso se pretende mellorar a sinalización para que estea actualizada e sexa de doada comprensión, e que ademais non xere un impacto visual negativo na contorna”.
Dada a complexidade do proxecto a realizar e a especificidade do mesmo, ao requirir estudo detallado sobre o terreo, deberá ser redactado por técnicos especializados nesta materia polo cal optouse pola contratación dun servizo externo para a redacción do devandito plan.
Segundo os servizos municipais o concello conta con 71 sinais de carácter turístico repartidas en diferentes puntos do territorio que presentan “unha casuística moi diferente”. O presente PSTD a través da actuación 14 representa unha oportunidade para reducir os elementos de sinalización mitigando o impacto visual actual e ao mesmo tempo impulsar a homologación da sinaléctica turística no destino.
Por iso o Plan Integral de sinalización turística dos recursos do destino ten como obxectivos:
-Identificar os sinais existentes nos puntos de maior carga turística do municipio ata un máximo de 100 elementos.
– Analizar o estado de situación dos devanditos sinais segundo unha clasificación previa acorde á súa finalidade que pode ser direccional/normativa, turística, informativa de servizos básicos e publicitaria (de empresas privadas que operan no territorio).
– Realizar unha proposta de intervención (segundo a situación de cada caso) para mellorar a sinalización existente de maneira integral diferenciando entre os elementos a retirar, a repoñer, unificar ou novos elementos a instalar.
A empresa encargada recompilará a información e documentación para o estudo, realizará o estudo de campo para ter o inventario e fará unha proposta de intervención para mellorar a sinalización contemplando para aqueles sinais que non sexan publicitarios (de empresas privadas) a unificación de sinais en tótems sempre que sexa oportuno, a reciclaxe ou recuperación de materiais sempre que sexa posíbel e aqueles sinais (especialmente de información de recursos turísticos) que deberían terse en conta para unha posíbel sinaléctica intelixente mediante códigos QR.
A redacción de dito proxecto foi adxudicado á empresa Trivium Extratexias en Cultura e Turismo S.L. por un total de 11.979€ IVE incluido dos fondos adxudicados polo Plan de Sustentabilidade Turística de Ribeira no marco do Plan de Recuperación, Transformación e Resilencia, financiado pola Unión Europea Next Generation EU dos cales restan 107.900€ para a montaxe da nova sinalización. A data límite de execución será o vindeiro 26 de outubro.
