A Concellería de Obras de Rianxo impulsou neste remate de setembro novos asfaltados en vías municipais. As actuacións, valoradas en 93.000€, levaranse a cabo en estradas localizadas nos núcleos de Rianxiño (Rianxo), Brión (Leiro) e A Capela (Araño). Estas consistirán sobre todo na renovación do firme cunha capa de mistura bituminosa en quente, informou o Concellería, engadindo que estes traballos súmanse a actuacións semellantes executadas durante o presente exercicio nos núcleos de Suigrexa (Asados), A Revolta (Asados), Salto do Lobo (Rianxo) e Ourolo (Taragoña) no marco do desenvolvemento do Plan de Mantemento das Vías Municipais deseñado polo Executivo de Julián Bustelo. Canda estes, acometéronse tarefas de nivelación do firme mediante aplicación de rego asfáltico en outros puntos do municipio.
O concelleiro de Obras, José Alberto Angueira, destacou o “esforzo investidor que está a realizar o Concello de Rianxo botando man de fondos propios para pouco a pouco ir corrixindo o estado no que se atopan moitas vías municipais”.
