O Centro Recreativo de Artes e o Concello de Ribeira, a través da súa Área de Cultura, organizan a 11ª edición do Concurso de Poesía Albariza. Ao acto de presentación non faltou a concelleira de Cultura, Antía Alberte xunto con Manuel Reiriz, presidente do Centro Recreativo de Artes, Naima El Gargari, da parte directiva do centro e o técnico de cultura, Unai González.
Segundo fixeron saber, poderán participar no concurso todas as persoas que presenten as súas obras en lingua galega. Os traballos presentados deberán ser orixinais e inéditos en toda a súa extensión, sen sinatura nin sinal ningún que denuncie a súa procedencia.
Alberte abriu o acto felicitando aos representantes do Centro Recreativo por chegar a está undécima edición. Tamén matizou que “é un valor incentivar a arte da escrita, tan persoal, tan subxectiva como pode ser a poesía, tan libre ao final; porque é un eido que nos expande máis alá da narrativa, permítenos xogar coa lingua”. Finalizou agradecendo a Reiriz por continuar con esta idea, e engadiu que o Concello o ano pasado tomou as rendas de facelo conxuntamente e como concelleira de Cultura comprometeuse “á súa continuidade”.
Reiriz anunciou que a nova xerente do C.R.A. vai ser Naima que se encargará da coordinación desta undécima edición e agradeceu o labor que desempeñan no certame Alicia Padín xunto con Unai González e á concelleira de Cultura e máis o concello de Ribeira.
Manuel Reiriz anunciou que deixa a presidencia do centro na próxima asemblea despois de 40 anos.
O prazo de admisión de orixinais rematará o 21 de outubro do 2024, ás 15:00 horas.
A entrega de premios celebrarase o domingo 10 de novembro, ás 17:00 h no C.R.A. ca actuación da rondalla Os Trovadores de Ares máis un ágape para os asistentes, ao remate.
As bases estarán publicadas na web municipal.
