O Centro Social de Escarabote vai dar acollida este xoves 26 de setembro á función Contos enmaletados. A cita será o xoves ás 20.00 horas e encádrase no programa de actividades para o fomento da lectura Ler Conta Moito. Trátase dunha función para todos os públicos con entrada de balde, a cargo de Giovanni Peixoto e Inés Piñeiro.
Contos enmaletados achegan ao público unha serie de personaxes concibidos de distintos materiais que interactuan cos espazos. A obra discorre entre diferentes técnicas como a de monicreques de luva, máscaras, obxectos e danza contemporánea. Os contos tratan temas actuais e importantes que queremos poñer en evidencia para crear unha conciencia, a inmigración, o crecemento persoal ou o valor da natureza.
